कंपनीतील कर्मचाऱ्याकडे खंडणीची मागणी; माथाडी संघटनेचा पदाधिकारी अटकेत

पुणे,दि.२८ जुलै (चेकमेट टाईम्स) : पुण्यातील खासगी कंपनी तसेच व्यावसायिकांना कामगार पुरविणाऱ्या ठेकेदाराकडे खंडणी मागणाऱ्या एका माथाडी संघटनेच्या पदाधिकाऱ्याला बिबवेवाडी पोलिसांनी अटक केली. ओंकार रमेश हिंगे (वय २३, रा. शिवतेजनगर, बिबवेवाडी) असे अटक करण्यात आलेल्याचे नाव आहे. याबाबत खासगी कंपनीतील एका कर्मचाऱ्याने बिबवेवाडी पोलीस ठाण्यात फिर्याद दिली आहे. तक्रारदाराच्या कंपनीकडून खासगी कंपन्यांना कामगार उपलब्ध करुन देतात.

अप्पर इंदिरानगर- गंगाधाम रस्ता परिसरात व्यावसायिकांना तक्रारदाराच्या कंपनीकडून कामगार उपलब्ध करुन देण्यात आले होते. हिंगे तक्रारदाराला काही दिवसांपूर्वी भेटला. मी माथाडी संघटनेचा पदाधिकारी आहे. या भागात काम करायचे असेल तर माझ्या संघटनेकडून सुचविण्यात आलेल्या कामगारांना काम द्यावे लागेल. माझ्या संघटनेतील कामगारांकडून सर्व कामे करुन घ्यावी लागतील तसेच दरमहा ४० हजार रुपये एवढा हप्ता द्यावा लागेल, अशी धमकी हिंगेने तक्रारदाराला दिली. त्यानंतर तक्रारदाराने बिबवेवाडी पोलिसांकडे तक्रार दिली. वरिष्ठ पोलीस निरीक्षक विलास सोंडे यांच्या मार्गदर्शनाखाली सहायक निरीक्षक राजकुमार बरडे आणि पथकाने सापळा लावून हिंगेला पकडले. हिंगेने अशा प्रकारे खंडणी मागण्याचे आणखी काही गुन्हे केल्याची शक्यता असून तक्रार करण्याचे आवाहन पोलिसांनी केले आहे. सहायक निरीक्षक बरडे तपास करत आहेत.